Masallıda şəhid ailəsi üçün ev tikilib

Qarabağ müharibəsi əlilləri və şəhid ailələrinin sosial-məişət şəraitini yaxşılaşdırmaq üçün Masallı Rayon İcra Hakimiyyətinin təşəbbüsü, xeyriyyəçilər və iş adamlarının dəstəyi ilə rayon ərazisində şəhid ailələri üçün evlər tikilir.
Növbəti belə ev Masallı rayonunun Tüklə kəndindən olan şəhid ailəsi üçün inşa edilib.
Qarabağ müharibəsi şəhidi, Azərbaycan Ordusunun əsgəri Zəfər Asəf oğlu Xəlilovun ailəsi üçün tikilən birmərtəbəli kürsülü fərdi yaşayış evi istifadəyə verilib.
Evin açarlarını şəhid valideynlərinə təqdim edən Masallı Rayon İcra Hakimiyyətinin başçısı Araz Əhmədov Müzəffər Ali Baş Komandan İlham Əliyevin rəhbərliyi, ordu-xalq birliyi, Zəfər kimi qəhrəman oğullarımızın rəşadəti sayəsində qazanılan tarixi zəfərimizdən, Respublika Prezidenti cənab İlham Əliyev və Birinci vitse-prezident Mehriban xanım Əliyeva tərəfindən şəhid ailələrinə, müharibə əlillərinə və onların ailə üzvlərinə göstərilən diqqət və qayğıdan danışıb.
İcra başçısı şəhid ailəsi üçün fərdi yaşayış evinin tikintisinə dəstək olan xeyriyyəçilərin əməyini xüsusi vurğulayıb. 
Şəhid ailəsinin üzvləri onlara göstərilən yüksək diqqət və qayğıya görə dövlətimizin başçısına, Birinci vitse-prezidentimizə, rayon rəhbərliyinə, evin tikintisində zəhməti olan bütün şəxslərə minnətdarlıqlarını bildiriblər.

Akif AĞAYEV