Azərbaycanın bank sektorunda  zəif bəndlərdən birinə çevrilən “AG Bank”ın 2018-ci ilin üçüncü rübü üzrə hesabatında diqqət çəkən məqam ötən ilin eyni dövrü ilə müqayisədə aktivlərinin həcmindəki artımlardır. Ümumən isə bank yenə də böyük zərər içindədir.

Faiz gəlirləri azalıb

BI xəbər verir ki, mənfəət və zərər hesabatına əsasən, bankın faiz gəlirləri bir illik müqayisədə 23,1% azalaraq 13 milyon 700 min manat, faiz xərcləri isə 23,6% azalaraq 12 milyon 995 min manat olub. Bu da bankın qaytarılması mümkün olmayan kreditlərinin artmasından xəbər verir.
Bankın qeyri-faiz gəlirləri illik müqayisədə cuzi artaraq 23 milyon 463 min manat, qeyri-faiz xərcləri isə 27 milyon 327 min manat təşkil edib.

Əməliyyat zərəri artıb

“AG Bank”ın əməliyyat zərəri illik müqayisədə 6 dəfə artaraq 3 milyon 159 min manat olub.  Bank aktivlər üzrə mümkün zərələrin ödəmilməsi üçün ehtiyatını illik müqayisədə 2,6 dəfə artırıb və 2 milyon 801 min manata çatdırıb.
Nəticədə “AG Bank”ın zərəri illik müqayisədə 4 dəfəyə yaxın artaraq 6 milyon 122 min olub.
 

“AG Bank”ın cəmi aktivləri illik müqayisədə 2,2% artaraq 522 milyon 19 min manat olub. Bankın aktivlərində nağd vəsaitləri və “nostro hesabları”ı üzrə həcmlərdə cüzi artım olub. Bankın müştərilərinə verdiyi kreditin həcmi 2017-ci ilin eyni dövrü ilə müqayisədə 0,6% artaraq 285 milyon 93 min manata çatıb.
30 İyun 2018-ci il tarixində Mərkəzi Bankın "AG Bank"a qarşı tələbləri 40 milyon manat təşkil etmişdi. 30 sentyabr 2018-ci il tarixində bu məbləğ 45 milyon manata çatıb.

Bankın cəmi öhdəlikləri 4,7% artaraq 480 milyon manat təşkil edib. Depozit portfelində isə illik müqayisədə 15,4% artaraq 246 milyon 791 min manat olub.

“AG Bank”ın cəmi kapitalı 2017-ci ilin müvafiq dövrü ilə müqayisədə 20% azalaraq cəmi 42 milyon 17 min manat olub.