Özbəkistandakı Heydər Əliyev adına Azərbaycan Mədəniyyət  Mərkəzinin layihəsi ilə iyun ayının ilk yarısında bu ölkədə “Azərbaycan mədəniyyəti və ədəbiyyatı günləri” keçirilib.

Bununla əlaqədar keçirilən tədbirlər çərçivəsində Gülüstan, Daşkənd şəhərlərində Azərbaycan mədəniyyətinə, ədəbiyyatına aid tədbirlər keçirilib.

Bu barədə məruzə ilə çıxış edən Heydər Əliyev adına Azərbaycan Mədəniyyət  Mərkəzinin direktoru Samir Abbasov dostluq və əməkdaşlığın möhkəmləndirilməsi, milli mədəniyyətimizin tanıdılması və təbliğinə yönəlmiş bu cür tədbirlərin əhəmiyyətindən danışıb. O, rəhbərlik etdiyi Mədəniyyət Mərkəzinin layihəsi ilə mədəniyyət və ədəbiyyat günləri çərçivəsində 2 möhtəşəm konsert proqramının, moda sərgisinin, 2 kitab təqdimatının keçirildiyini qeyd edib. Samir Abbasov Daşkənddəki aparıcı kitabxanalara ölkəmizə dair zəngin kitab kolleksiyasının bağışlandığını, keçirilən tədbirlərdə “Azərbaycan, sənsən mənim ülviyyətim” adlı kitab, milli mədəniyyətimizi özüendə əks etdirən suvenirlər, maddi-mədəniyyət nümunələrinin sərgisinin keçirildiyini qeyd edib.

O, Azərbaycan yazıçısı Yunus Oğuzun yaradıcılığı haqqında danışaraq, onun 2016-cı il aprel hadisələrinə həsr olunmuş və Daşkənddə Özbək dilində nəşr olunmuş “Ovçu” romanını yüksək qiymətləndirib. Samir Abbasov Aprel zəfərinin qəhrəmanları, xüsusən polkovnik Murad Mirzəyev və onun döyüş yoldaşlarının həyat  yolundan bəhs edən əsərin xalqımızın milli qəhrəmanlıq hislərinin yüksəldilməsinə öz töhvəsini verdiyini bildirib.

Çıxış edənlər Özbəkistanda keçirilən “Azərbaycan mədəniyyəti və ədəbiyyatı günləri”ni yüksək qiymətləndirərək, məhz  Azərbaycan Mədəniyyət  Mərkəzinin layihəsi ilə həm milli mədəniyyətimizə, həm də ədəbiyyatımıza dair çoxsaylı tədbirlər, layihələr vasitəsi ilə geniş məlumatlandırma və təbliğat işlərinin həyata keçirildiyini vurğulayıblar.

Filoloq alim Nurbay Cabbarov Azərbaycan-Özbəkistan ədəbi əlaqələri haqqında danışaraq, müasir dövrdə də bu əlaqələrin yüksək səviyyədə olduğunu söyləyib. O,  Yunus Oğuzun Özbək xalqının, ümumilikdə Türk dünyasının böyük hökmdarı Əmir Teymur haqqında əsər yazmasını onu oxuculara daha da tanıtdığını və sevdirdiyini deyib.

Kitabın tərcüməçisi filoloq alim Gülbahar Aşurova qəhrəmanlıq və vətənpərvərlik mövzusunda yazılan “Ovçu” romanında yaradılan obrazların gənclərimiz üçün bir nümunə olduğunu qeyd edib, kitabın təbliğinin gənclərin vətənpərvərlik ruhunun inkişafında müsbət rol oynayacağını söyləyib.

Çıxış edən filoloqlar Babaxan Şərif, Bürabiya Racabova, Xaydarbek Bababekov Özbəkistanla Azərbaycan arasında ədəbi əlaqələr,  tarixi dostluq münasibətləri haqqında məruzə edərək, cəmiyyətdə bu cür əsərlərin  yayılmasına və təbliğinə  geniş ehtiyac olduğunu qeyd ediblər.

Müəllif Yunus Oğuz çıxışında “Ovçu” romanı haqqında fikirlərini bölüşüb, əsərin yaranması, onun yazılması ilə bağlı xatirələrini danışıb, romanın müasir tariximizə bağlı yazdığı ilk əsər olduğunu qeyd edib. O, gələcəkdə də torpaqlarımızın azadlığı, Qarabağ uğrunda savaşan əsgər və zabitlərimizin şərəfli döyüş yolu haqqında daha möhtəşəm əsərlər yazmaq niyyətində olduğunu qeyd edib.

Sonda Özbəkistanın tanınmış “Turan” Elm Akademiyası türk tarixini geniş araşdırdığı, bu istiqamətdə böyük əsərlər yaratması və geniş təbliğ etdiyi üçün yazıçı Yunus Oğuzu Akademiyanın fəxri akademiki adına layiq gördü.

Tədbirdə “Azərbaycan mədəniyyəti və ədəbiyyatı günləri”nin bağlanışı münasibəti ilə bədii proqram iştirakçılara təqdim olunub.

Bədii proqramda Azərbaycan Mədəniyyət Mərkəzinin nəzdindəki “Azərbaycan qızları” rəqs ansamblı, Azərbaycan, Özbəkistan və Tacikistanın mədəniyyət ustalarının iştirakı ilə milli rəqslər, musiqilər ifa olunub.

MÜSAHİBƏ:

1) Kuzıbayeva Narqiza – “Turan” Kitabxana- İnformasiya Mərkəzinin direktor müavini.

Bu gün Azərbaycanlı yazıçı Yunus Oğuzun “Ovçu” romanının təqdimatı keçirildi. Çox maraqlı bir romandır, təqdimat çox gözəl keçdi.

Bizim “Turan” Kitabxana- İnformasiya Mərkəzi Azərbaycan Mədəniyyət Mərkəzi ilə sıx əməkdaşlıq edir, Mərkəzin təşkil etdiyi bu növ tədbirlərdə aktiv iştirak edir.  Biz Azərbaycan Mədəniyyət Mərkəzi ilə iki xalq arasında dostluq əlaqələrinin inkişafı, milli vətənpərvərlik və qəhrəmanlıq hisslərinin gücləndirilməsi, mütaliənin təbliği ilə bağlı birgə layihələr həyata keçiririk.

Bu günki tədbir və kitab təqdimatı hər kəs tərəfindən çox bəyənildi. Aprel döyüşlərinə, Azərbaycan xalqının zəfər tarixinə həsr olunmuş bu kitab çox maraqlı bir kitabdır. Mən bu kitabı oxumağa hər kəsə məsləhət görürəm. Gənclərdə milli vətənpərvərlik hisslərinin yüksəlməsinə xidmət edən bu cür nəşrlərin sayı artmalıdır.

2) Burobiya Rəcəbova – Ozbəkistan Respublikası Milli Elmlər Akademiyasının alimi, filalogiya fənləri namizədi.

Bu gün Daşkəndəki Heydər Əliyev adına Azərbaycan Mədəniyyət Mərkəzində, özbək oxucularının sevimli yazıçısı olmağı bacarmış, Azərbaycanlı yazıçı Yunus Oğuzun “Ovçu” romanının təqdimatı oldu.

Təqdimat çox gözəl keçdi, Vətənə məhəbbət, qəhrəmanlıq ruhunda yazılan bu əsərlə Yunus Oğuz ədəbiyyatımıza töhfə verib.

Azərbaycan Mədəniyyət Mərkəzi sayəsində özbək oxucuları Azərbaycan ədəbiyyatı, tarixi və mədəniyyəti ilə yaxından tanış olmaq və bu barədə çoxlu sayda kitablar oxumaq imkanı əldə ediblər.

Bu gün mütaliə nəinki Özbəkistan və Azərbaycanda, dünyanın bütün ölkələrində böyük problemə çevrilib. Televiziya, radio, internet insanları kitabdan bir qədər uzaqlaşdırıb. Kitab bizim qədimi və bu günki dostumuzdur.

Yunus Oğuza biz təşəkkür edirik ki, o bu gün bizə qədimi və bu günki dostumuzu hədiyyə etdi. Oxuyun və mütaliyyə edin.