Canveten.az xəbər verir ki,  Belarus Respublikasının paytaxtı Minsk şəhərində ənənəvi XXVI beynəlxalq kitab sərgi-yarmarkası açılıb. Sərgi fevralın 6-sı işə başlamışdır.

Sərgi-yarmarkada Azərbaycan Respublikasının Mədəniyyət Nazirliyi ölkəmizin Belarusdakı səfirliyinin dəstəyi ilə milli stend qurub. Azərbaycanın stendi tərtibatı və kitabların çeşidinə görə sərginin mühüm stendlərindən biri kimi qiymətləndirilib. Stenddə Azərbaycanın bugünkü həyatı, Dağlıq Qarabağ münaqişəsi, Xocalı soyqırımı, həmçinin ölkəmizin tarixi ilə bağlı mühüm kitablar sərgilənir. İştirakçılar tərəfindən böyük maraqla qarşılanan milli stendimizi ziyarət edənlərə mədəniyyətimiz, tariximiz, adət-ənənələrimiz, müasir ədəbiyyatımız haqqında geniş məlumat verilir, onlara jurnal, informasiya bukletləri paylanılır.

Sərginin açılış günü milli stendi Belaruslu rəsmi şəxslər, xarici ölkələrin səfirləri, Rusiya Prezidentinin beynəlxalq mədəni əməkdaşlıq məsələləri üzrə xüsusi nümayəndəsi Mixail Şvıdkoy, ölkəmizin Belarusdakı fövqəladə və səlahiyyətli səfiri Lətif Qəndilov ziyarət etmişdir.

Respublikanın müxtəlif nəşriyyatları tərəfindən çap edilən məhsulların nümayiş olunduğu ekspozisiyanın fəaliyyətində Azərbaycan Dövlət Nəşriyyatı - "Azərnəşr" fəal iştirak edir.

Qeyd edək ki, sərgi fevralın 10-dək davam edəcəkdir.

! © Müəllif hüquqları qorunur ! Məlumatdan istifadə etdikdə istinad mütləqdir ! Məlumat internet səhifələrində istifadə edildikdə müvafiq keçidin qoyulması mütləqdir !!!  

ŞƏRHLƏR :

( Sos.şəbəkədə gedən yazışmanin FOTO-ƏKSİ. Məzmun və qramatik səhvlərə görə redaksiya məsuliyyət daşımır )