GÜLAĞA TƏNHA

GÖZLƏRİN QAL DEYİR

Bu necə ayrılıq, bu necə sevda,
Gözlərin «Qal!» – deyir,
dodaqların «Get!».
Baxışın bir açar, dilin bir qıfıl,
Əllərin «Aç!» – deyir,
                    dodaqların «Get!».

Ayrılıq – dönüşü olmayan uğur,
Tənhalıq – dağlarda qırılan cığır…
Gör neçə sevdalar kül oldu bir-bir,
Göz yaşın «Qal!» – deyir,
                           dodaqların «Get!».

Divardan düşsünmü rəsmlərimiz?
Yalandan danışsın bu dillərimiz?
Hanı unudulmaz gecələrimiz?–
Xoş günlər «Qal!» – deyir,
                          dodaqların «Get!».

Ömür damla-damla itər, silinməz,
Bir sevgi nəğməsi bitər, görünməz,
Ayrılıq nəğməsi ötər, bilinməz,
Gözlərin «Qal!» – deyir,
                        dodaqların «Get!»…

Bakı, 5 may, 2000

GÜLAĞA TƏNHA:

 GÖZLƏRİN QAL DEYİR

ifa edir: Elməddin Məmmədov