Gəlin bir anlıq təsəvvür edək: Güllərin, bülbüllərin məskəni olan Qarabağda bir gün müharibə başlayır. Səsi ilə bütün bağ - baxçanı sehirləyən quşlar, atəş səslərindən yerli sakinlərə qoşulub uçub gedirlər... Sükut pozulduğuna görə, sehir də itir. Yerdə qalan, xatirələr və şəhidlər olur. Məqam olan kimi şəhidlər götürülərək dəfn edilir . Sonra, xarabalıqları bəzəyən sükut oldu. Quşlar diksindiklərindən, xeyli vaxt o məkanlara tərəf uçmadılar. Meşədə, düzdə olan hər bir ağacın budaqları intizar içində qaldı. İllər sonra ayrılığa dözməyən Sarı bülbül, cəsarətini yığıb aşiq olduğu bağın hüzuruna gəlir, ürəyində yığılıb qalan nəğmələri oxumağa başlayır ... Vətən aşiqləri dayanmadan ötən bülbülü hürkütməmək üçün Qarabağı səssiz, səmirsiz geri almağa qərara alır...

Azpress.az – saytı xeyriyyəçi – şair Gülağa Tənhanın sözlərinə yazılmış “Sarı bülbül” mahnısını təqdim edir. Bəstəkar: Əməkdar incəsənət xadimi Ramiz Mirişli, ifa: Xalq artisti Azər Zeynalov.

SARI BÜLBÜL

Köksünə tikanmı batıb,
A taleyi sarı bülbül?!
Qan ağlayan qəhərini
Böləsiyəm yarı, bülbül.
Oxuyursan, yoxsa sən də
yad əliylə qara gələn
Tariximi ağlayırsan?
O tarixi yazanların
Taleyini dağlayırsan?!
Dağlar tökür göz yaşını,
Əridirsən qarı, bülbül!
Səsini məlhəm bilirəm,
Gəl yaramı sarı, bülbül!
O zaman söz yiyələri
Ulduzu, Ayı öyürdü.
«Partiyanın eşqi ilə»
Bəyaz sarayı öyürdü.
Nə müddətdi Qarabağda
Susdurublar tarı, bülbül.
Səsin bu dərdin özüdü,
Oxuyursan, Sarı bülbül!..
Oxuyursan nə zamandı,
Ötənləri ana-ana.
Nə heyrətdi, nə gümandı? –
Oxuyursan yana-yana.
Yolun üstə dayanardı,
Gözü yolda qalan Şuşa.
Səsin ilə oyanardı,
Bir tamaşa olan Şuşa.
Ömürdən can uman qəhər
Bir ürəyə sığandımı?
Oxuduğun nəğmə deyil,
Ruh sarsıdan fəğandımı?
Şuşasız qalmısan deyə
Yaman təntiyib nəfəsin.
Dərd-qəminə dərman deyə
Qisasa çağırır səsin.
Yağı bilmirmi ki, Şuşa
Od oğlunun Şuşasıdı?
Qisas qalmaz qiyamətə,
Millət bir gün coşasıdı!
Şuşaya uç, vaxtı çatıb,
Gələk sənə sarı, bülbül!
Səsin şəhid harayıdı,
Oxu, oxu, Sarı bülbül!..
Bakı, 9 may, 1993

hazırladı: Ağa Mühəmməd Aman

#Gülağa #Tənha #Gulaga #Tenha #Qəmbərov #Qemberov #Qəmbərov #Qemberov #гюльага #гамбаров #ганбаров #Тенхa