İtaliyanın Genuya Universitetində “25 illik Azərbaycan-İtaliya münasibətləri Aralıq dənizi, Qara dəniz və Xəzər dənizinin şahidliyi kontekstində” mövzusunda Beynəlxalq Elmi Konfrans keçirilib.

Fəlsəfə İnstitutundan verilən məlumata görə, bir sıra Avropa ölkələrindən tanınmış alimlərin iştirak etdikləri  konfransda Azərbaycanı AMEA-nın Fəlsəfə İnstitutunun direktoru, fəlsəfə üzrə elmlər doktoru, professor İlham Məmmədzadə, Azərbaycan Respublikasının  Prezidenti yanında Dövlət İdarəçilik Akademiyasının professoru, hüquq üzrə elmlər doktoru İsaxan Vəliyev, AMEA-nın Fəlsəfə İnstitutunun Beynəlxalq Əlaqələr şöbəsinin müdiri, filologiya üzrə fəlsəfə doktoru Zöhrə Əliyeva təmsil ediblər.

Konfransda “Azərbaycan və İtaliya fəlsəfəsinin qarşılıqlı təsiri” mövzusunda çıxış edən İlham Məmmədzadə Azərbaycan və İtaliya alimləri arasında ciddi elmi əlaqələrin olduğunu xatırladıb, rəhbərlik etdiyi İnstitutun İtaliyanın Ca Foscari, Genuya universitetləri kimi tanınmış elm və təhsil ocaqları ilə mütəmadi birgə elmi tədbirlər keçirməsindən söhbət açıb, ölkə rəhbərliyinin Azərbaycan elminin inkişafı üçün münbit şəraitin yaradılması istiqamətində gördüyü işlərdən danışıb.

“Azərbaycan-İtaliya mədəni əlaqələri hüquqi müstəvidə” mövzusunda çıxış edən professor İsaxan Vəliyev iki dövlət arasında diplomatik əlaqələrin tarixinə diqqət çəkərək, Azərbaycan müstəqilliyini bərpa etdikdən sonrakı dövrdə ümummilli lider Heydər Əliyevin İtaliyaya səfərləri zamanı imzalanmış sənədlərin hüquqi mahiyyəti barədə məlumat verib, iki dövlət arasında  ulu öndər tərəfindən əsası qoyulmuş siyasətin Prezident İlham Əliyev tərəfindən uğurla davam etdirildiyini vurğulayıb. Natiq multikulturalizmin Azərbaycan modelinin hüquqi əsaslarından danışaraq, tolerantlığın çoxmillətli Azərbaycan xalqının həyat tərzinə və dövlət siyasətinə çevrildiyini nümunələrlə diqqətə çatdırıb.

“Azərbaycan-İtaliya münasibətləri: dinlərarası dialoq prizmasinda” mövzusunda çıxış edən filologiya üzrə fəlsəfə doktoru Zöhrə Əliyeva islam dininin sülh, barışıq dini olduğunu xatırladıb, ölkədə mövcud olan müxtəlif dinlərin qarşılıqlı harmoniyasının fəlsəfəsindən bəhs edib. Azərbaycan dövlətinin katolik, pravoslav, yəhudi və müsəlman dini abidələrinin qorunub-saxlanmasına böyük diqqət və qayğı göstərdiyini bildirən Z.Əliyeva bu abidələrin təmiri istiqamətində görülən işləri özündə əks etdiriən videoçarxı nümayiş etdirərək, ölkədə mövcud olan tolerant mühit barədə ətraflı məlumat verib.

Maraqlı elmi diskussiya şəraitində keçən tədbirdə Ca Foscari Universitetinin professoru Aldo Ferrari, Trento Universitetinin professoru Gian Franco Poggi, Milan Universitetinin professoru  Alessandro Vitale, Roberto de Vita Universitetinin  professorları  Alessandro Figus, Franco Cardini və digərləri çıxış edərək Azərbaycan və İtaliya arasında mədəni əlaqələrin əhəmiyyətindən danışıb, bu münasibətin Azərbaycanın iqtisadi inkişafına söykəndiyinə görə dayanıqlı olacağına inandıqlarını söyləyiblər. Natiqlər Azərbaycanın Avropaya inteqrasiyasında Avropa ölkələrinin özlərinin maraqlı olduqlarını elmi cəhətdən konkret faktlarla izah ediblər.  

Konfransdan sonra İtaliyada nəşr olunan nüfuzlu “Geopolitika, sosial müdafiə və azadlıq” adlı beynəlxalq elmi jurnalda Azərbaycan alimlərinin elmi məqalələri dərc edilib.