Ənənəvi həmrəyliyimizə sədaqətin nümunəsi

Bursa şəhərində fəaliyyət göstərən “Gələcəyin İnsanları və İmkanları Məkanı “Azərbaycan Deyincə” dərnəyinin (GİM AZDER) sədri, layihənin təşəbbüskarı Hüseyn Vəliyev 31 Dekabr – Dünya Azərbaycanlılarının Həmrəyliyi Günü və Yeni il ərəfəsində bizi sevindirci xəbərlə müjdələdi: Bursa vilayətinin Gürsu rayonunda şəhid mayor Anar Novruzov adına park salınacaq.
Həmyerlimiz bildirdi ki, Aprel və Tovuz döyüşləri qəhrəmanı, 3-cü dərəcəli “Vətənə xidmətə görə” ordenli şəhid mayor Anar Novruzovun adına parkın yaradılması üçün Bursa vilayəti Gürsu rayonunun Bələdiyyə Məclisi tərəfindən qərar imzalanıb. 
Məlumat üçün bildirək ki, bu vaxtacan GİM AZDER dərnəyinin təşəbbüsü ilə Osmanqazi bələdiyyəsi tərəfindən bir parka və Bursa Böyükşəhər bələdiyyəsi tərəfindən şəhərin mərkəzi prospektlərdən birinə Azərbaycanın Milli Qəhrəmanı Polad Həşimovun (Dəmirtaş bölgəsində) adı verilib. Həmçinin Bursa vilayətinin Karacabəy və Keles rayonlarında, müvafiq olaraq Azərbaycanın Milli Qəhrəmanları Şirin Mirzəyevin və Məzahir Rüstəmovun adına parklar salınıb.
Onu da əlavə edək ki, yaxın zamanlarda digər Milli Qəhrəmanlarımızın da adlarının əbədiləşdirilməsindən ötrü yeni layihə sənədlərinin imzalanması gözlənilir.
Biz də öz növbəmizdə iki qardaş ölkə ilə bağlı bu cür geniş layihələrin gerçəkləşməsini Türkiyə-Azərbaycan dostluq münasibətlərinin bariz nümunəsi kimi səciyyələndirir və alqışlayırıq. 
Şəhid Anar Novruzovun ailəsi adından bu nəcib işdə, qəhrəmanlarımızın qardaş Türkiyədə tanıdılmasından ötrü əlindən gələni əsirgəməyənlərə, xüsusilə Bursa şəhərində fəaliyyət göstərən “Gələcəyin İnsanları və İmkanları Məkanı “Azərbaycan Deyincə” dərnəyinin (GİM AZDER) sədri, layihənin təşəbbüskarı Hüseyn Vəliyevə, Bursa vilayəti Gürsu rayonunun bələdiyyə sədri Mustafa İşıka, Bələdiyyə Məclisi üzvlərinə, Türkiyə Qazi və Şəhid Ailələri Vəqfi (TÜGŞAV) Bursa şöbəsinin sədri, Kıbrıs qazisi Fikri Özderə və digərlərinə minnətdarlığımızı bildiririk.

Akif AĞAYEV