Fransada yüzlərlə müəssisə talan edilib 

Fransanın Lion və Marsel kimi böyük şəhərlərində baş verən iğtişaşlar yerli müəssisələrə də ciddi təsir edib.

CAN VƏTƏN xəbər verir ki, bu barədə "France 24" telekanalı məlumat yayıb.

Fransanın maliyyə naziri Bruno Le Maire sığorta şirkətlərini tez bir zamanda təzminat ödəməyə çağırıb.

Le Maire əlavə edib ki, 250 tütün mağazası, 250 bank və 200 supermarket talan edilib.

"Biz sığortaçılardan öz prosedurlarında mümkün qədər sadə olmalarını xahiş etmişik", - nazir qeyd edib.

Xatırladaq ki, Fransada etirazlar iyunun 27-də başlayıb. Buna səbəb 17 yaşlı Nahel adlı gəncin polis tərəfindən qətlə yetirilməsi olub. Cümə gecəsi baş verən toqquşma zamanı 249 polis və jandarm yaralanıb.

“Təhlükəli ərazilərdə” əyləncə tədbirləri ləğv edilib, gecə saatlarında ictimai nəqliyyatın hərəkəti dayandırılıb. Bəzi kommunalarda komendant saatı tətbiq edilib.