Təqvim
"Zavodlar Avro 6 modellərini Azərbaycana göndərməkdən imtina edirlər"
02 oktyabr 2018 - 08:49

Qərbin bir sıra avtomobil istehsalçıları Azərbaycandakı rəsmi tərəfdaşlarına Avro 6 və Avro 6+ emissiya standartlarına uyğun son modellərini göndərməkdən imtina edirlər.

Bİ.az xəbər verir ki, bunu avtomobil bazarındakı mənbə bildirib.

Mənbənin sözlərinə görə, problemin yaranmasına səbəb Azərbaycanda Avro 4 standartına uyğun yanacağın istehsal edilməsidir:

“Hazırda Avropada əksər avtomobillər atmosferə atılan zərərli maddələrə dair Avro 6  və Avro 6+ standartlarına uyğun istehsal olunur. Azərbaycanda istehsal olunan benzinin isə rəsmi olaraq Avro 4 standartına uyğun olduğu bildirilir. Avtomobil şirkətlərinin araşdırmaları göstərir ki, Azərbaycanda istehsal edilən benzin Avro 3 standartına uyğundur. Bu benzin Avro 6 və Avro 6+ standartına uyğun avtomobillərdə istifadə etdildikdə, avtomobilin yanacaq sistemində və mühərrikində problemlər yaranır. Bildiyimiz kimi, yeni avtomobillərə adətən 3 və ya 5 il zəmanət verilir. Zəmanət dövründə yaranan qüsurlar zavodun hesabına aradan qaldırılır.  Azərbaycanda zəmanətlə satılmış Avro 6 avtomobillərdə qısa müddət sonra nasazlıq yaranır, bəzi hissələr sıradan çıxır. Araşdıran zaman məlum olur ki, nasazlıq benzinə görədir. Bu səbəbdən bəzi istehsalçılar Azərbaycana Avro 6 + standartına uyğun avtomobillərini göndərməkdən imtina edirlər. Bizə, “ölkənizdəki yanacaq problemini həll edin” deyirlər”.

Mənbə qeyd etdi ki, yaranan nasazlığa görə avtomobil sahibi ilə rəsmi diler arasında mübahisə yaranır:

"Məsələn, sıradan çıxmış benzin nasos zavoda göndərilir. Araşdırma nəticəsində məlum olur ki, qüsur zavodluq deyil, sırf keyfiyyətsiz benzindən istifadəyə görə benzin nasos sıradan çıxıb. Belə olan halda, bu hissə zəmanət şərtləri ilə dəyişdirilmir və haqqı alıcı tərəfindən ödənilir. Bir çox alıcı da bunu qəbul etmək istəmir.  O, avtomobili yeni aldığını deyir, qısa müddətdə benzin nasosun sıradan çıxmasını qəbul etmir və istehsalçını günahlandırır".

Sosial şəbəkələrdə paylaş:
Mənbə:
© marja
Kateqoriya:
PREZİDENT

Bütün hüquqlar qorunur © 2024

Haqqıımızda | Saytda reklam | Bizimlə əlaqə