Mənim hər il dekabr ayında Bakıda, Moskvada, Sankt-Peterburqda keçirilən konsertlərim ad günümə ən yaxşı hədiyyədir. Bu, dostlarımı, yaxınlarımı, pərəstişkarlarımı bir yerə toplamaq üçün də yaxşı fürsətdir.

AZƏRTAC xəbər verir ki, bu barədə tanınmış müğənni, Azərbaycanın Xalq artisti Emin Ağalarov "Bumeranq 2018" adlı solo-konsertindən əvvəl jurnalistlərlə görüşündə bildirib.

E.Ağalarov deyib: "2018-ci il mənim üçün məhsuldar olub. "Jara" festivalı isə həmişə olduğu kimi, parlaq və yaddaqalan idi. Bu il mənim "Neba ne boyalis" ("Səmadan qorxmurduq") albomum işıq üzü görüb. Bu alboma bir çox hitlər, o cümlədən "Mənim Azərbaycanım" mahnısı daxil edilib. Bir çox televiziya layihələri olub. Ümidvaram ki, 2019-cu il daha da məhsuldar olacaq".

"Konsertlərimdən əvvəl fan-klubumun təşəbbüsü ilə "Xeyirxahlıq bumeranqı" aksiyası keçirilir. Disklərim, plakatlarım və s. xeyriyyə məqsədilə satılır. Yığılan bütün vəsait mənim tərəfimdən ikiqat artırılır, daha sonra konsertin keçirildiyi şəhərdə yerləşən uşaq evləri və ya xəstəxanalara verilir. Mən, həmçinin bu müəssisələrdən olan uşaqları öz konsertlərimə dəvət edir, onlarla görüşürəm. Onlar mənə musiqi sürprizləri hazırlayırlar. Xeyriyyəçiliklə məşğul olmaq çox vacibdir. Bir azərbaycanlı olaraq, öz həmvətənlərimə, həmçinin rusiyalılara yardım edirəm. Hətta mən hər hansı bir digər ölkədə olsam belə, kiminsə yardıma ehtiyacı olduqda, mütləq kömək edirəm. Mən daim irəliləməyi sevirəm. 2019-cu il üçün planlarım möhtəşəmdir", - deyə sonda müğənni bildirib.