Avqust müharibəsinin 14-cü ildönümündə Gürcüstan Xarici İşlər Nazirliyi Rusiyadan 2008-ci ildə imzalanmış atəşkəs sazişindən irəli gələn öhdəlikləri yerinə yetirməyi və qoşunlarını işğal olunmuş Abxaziya və Cənubi Osetiyadan çıxarmağı tələb edib.

Bu barədə Gürcüstan Xarici İşlər Nazirliyinin Rusiya-Gürcüstan müharibəsinin 14-cü ildönümü ilə bağlı bəyanatında deyilib.

“Rusiya-Gürcüstan müharibəsindən 14 il sonra Moskva Gürcüstanın işğal olunmuş ərazilərində - Abxaziya və Cənubi Osetiyada qanunsuz nəzarətini genişləndirməkdə davam edir.
14 illik işğaldan sonra Rusiya Aİ-nin vasitəçiliyi ilə 2008-ci il 12 avqust tarixli atəşkəs razılaşmasına əməl etmir, işğal olunmuş rayonlarda qeyri-qanuni nəzarətini genişləndirir, onların hərbiləşdirilməsi prosesini davam etdirir, onların faktiki ilhaqı istiqamətində fəal addımlar atır.
Rusiya yerdə təhlükəsizliyə, insan haqlarına və humanitar vəziyyətə zərbə vurur və işğal olunmuş ərazilərdə yaşayan insanları Gürcüstanın qalan hissəsindən və beynəlxalq ictimaiyyətdən təcrid etməyə çalışır”, - bəyanatda bildirilib.

Qeyd edək ki, Rusiya-Gürcüstan müharibəsi 2008-ci ilin avqust ayında Gürcüstan, Rusiya Federasiyası və Rusiya tərəfindən dəstəklənən, öz müstəqilliyini elan etmiş Cənubi Osetiya və Abxaziya arasında baş vermiş müharibədir. Bu müharibə XXI əsrdə Avropada baş vermiş ilk müharibə olaraq da tanınır.