Ukraynanın “Həyat uğrunda Müxalifət Platformu” partiyası siyasi şurasının sədri Viktor Medvedçuk saxlanılıb.

Bu barədə Ukrayna Prezidenti Volodimir Zelenski məlumat verib.

"Xüsusi əməliyyat Ukraynanın Təhlükəsizlik Xidmətinin köməyi ilə keçirilib. Afərin! Təfərrüatlar sonra", - Prezident feysbuk səhifəsində yazıb.

Qeyd edək ki, Medvedçuk işğal başladıqdan sonra fəaliyyəti qadağan edilmiş "Müxalifətçi Platforma - Həyat Uğrunda" Partiyasının lideridir və zəngin iş adamıdır. Təxminən 1 il əvvəl barəsində "vətənə xəyanət" ittihamı ilə cinayət işi açılıb və istintaq müddətində ev dustağı edilib.

Müharibə başladıqdan sonra Medvedçukun xaosdan yararlanaraq qaçdığı barədə xəbər yayılıb. Məlumatlara görə, Rusiya ordusu Kiyevə girib, Zelenskini devirdikdən sonra qurulacaq yeni hökumətə məhz Medvedçuk rəhbərlik edəcək, bu səbəblə Rusiya kəşfiyyatı onu hər ehtimala qarşı təhlükəsiz yerə qaçırıb.

Nəhayət bu gün Ukrayna Təhlükəsizlik Xidməti (SBU) Medvedçuku yaxalayıb. O, saxlanılan zaman Ukrayna ordusunun formasında olub.

Viktor Medvedçuk Kuçma dövründə Prezident Administrasiyasının rəhbəri vəzifəsində çalışıb. Qızı Darya dünyaya gələndə Rusiya Prezidenti Vladimir Putin körpənin xaç atası olub.