Təqvim
Su resurslarına qənaətdə gənclərin rolu
03 sentyabr 2020 - 14:33

1 sentyabr 2020-ci il tarixində Azərbaycan Respublikasının Ekologiya və Təbii Sərvətlər Nazirliyi, Gənclər Fondu və IDEA (Ətraf Mühitin Mühafizəsi Naminə Beynəlxalq Dialoq) İctimai Birliyinin təşəbbüsü ilə "Ekologiya və su resurslarından qənaətlə istifadə qaydaları" mövzusunda onlayn konfrans baş tutub.
 

Konfrans gəncləri bu qlobal mövzu barədə məlumatlandırmaq və su ehtiyatlarından qənaətlə istifadəyə təşviq etmək məqsədini güdüb.


Konfransda Azərbaycan Respublikasının Ekologiya və Təbii Sərvətlər Nazirliyinin sektor müdiri Faiq Mütəllimov və həmin Nazirlik yanında İctimai Şuranın üzvü Amin Məmmədov, Gənclər Fondunun şöbə müdiri Seymur Hüseynov, IDEA İctimai Birliyinin icraçı direktoru Surxay Şükürov, eləcə də “Azərbaycan Meliorasiya və Su Təsərrüfatı”  ASC-nin Aparat rəhbərinin müavini Kənan Abdullayev çıxış ediblər.


Gənclər Fondunun rəsmi facebook səhifəsi vasitəsilə canlı yayımlanan konfransda vurğulanıb ki, qlobal istiləşmə, ekoloji tarazlığın qorunub saxlanması, su, torpaq və atmosfer qatının çirklənmədən mühafizəsi ümumbəşəri problemlər arasındadır. Tədbirdə Azərbaycan Respublikası Prezidentinin 27 iyul 2020-ci il tarixli Sərəncamı ilə təsdiq edilmiş “Su ehtiyatlarından səmərəli istifadənin təmin edilməsinə dair 2020-2022-ci illər üçün Tədbirlər Planı” çərçivəsində görüləcək işlərə toxunulub, Azərbaycanda ətraf mühit problemlərinin  həllinə yönəlmiş dövlət siyasətinin ölkənin dayanıqlı inkişaf strategiyasının mühüm tərkib hissəsi olduğu bildirilib. Bu istiqamətdə həyata keçirilən tədbir və layihələrdə gənclərin əhəmiyyətli rolundan, onların mütəmadi olaraq innovativ ideyalarla çıxış edərək problemlərin həllinə öz töhfələrini vermələrindən də bəhs olunub.


Konfransın sonunda isə mövzu ətrafında gənclər üçün hədiyyəli intellektual müsabiqə təşkil  edilib.

Sosial şəbəkələrdə paylaş:
Kateqoriya:
İDMAN

Bütün hüquqlar qorunur © 2024

Haqqıımızda | Saytda reklam | Bizimlə əlaqə