Təqvim
BDU məzunları təəssüratlarını bölüşür
04 avqust 2020 - 18:47

Tədris ilinin sona çatması buraxılış kursunun tələbələri üçün sevincli, bir o qədər də kədərli anlar yaşadır. Neçə illər ərzində çəkdikləri əziyyət, yuxusuz gecələr, gərgin imtahan sessiyaları geridə qalır. Tələbəlik insanın gənclik çağının maraqlı, parlaq, unudulmaz illəri olduğu üçün ondan ayrılmaq çətin olur. Sona çatan tələbəlik illərinin acılı-şirinli günləri əlçatmaz bir xəyala dönür. Amma necə deyərlər, hər son bir başlanğıcın əvvəlidir. Necə ki, artıq məzunlarımız yeni həyata qədəm qoyur, onlar üçün yeni qapılar açılır. İnanırıq ki, məzunlarımız özlərini bir fərd kimi dərk etdikləri, gələcək uğurlarının təməli qoyulduğu Bakı Dövlət Universitetində gənclik dövrlərinin ən gözəl illərini yaşadılar, BDU isə xatirələrində ən doğma, ən əziz bir məkan kimi qalacaq.

Məzunlarımızın Bakı Dövlət Universitetində əldə etdikləri bilik və bacarıqlar, sosial fəaliyyətləri, iştirakçısı olduqları yarışlar, tələbə təcrübə proqramları, gələcək planları, abituriyentlərə tövsiyələri və BDU məzunu olmağın onlarda yaratdığı hisslər barədə fikirlərini, təəssüratlarını öyrəndik.



Kimya fakültəsinin ingilis bölməsindən məzun olan Mətanət Məmmədova deyir ki, Bakı Dövlət Universitetinin məzunu olmaq olduqca qürurverici hissdir. Dörd illik təhsil müddətində ən böyük dəstəkçiləri olan müəllimləri  tərəfindən ixtisaslarını öyrənməklə yanaşı, ingilis dilinə də akademik səviyyədə yiyələniblər. Müəllimləri, tələbə yoldaşları ilə bağlı gözəl xatirələrinin çox olduğunu söyləyən Mətanət, bütün müəllimlərin onunçün dəyərli, kimya ixtisasına yiyələndiyi üçün məhz onlara borclu olduğunu bildirdi. Mətanətlə söhbətimiz zamanı hər imtahan öncəsi tələbə yoldaşlarının “Biz bunu da bacararıq” deyərək bir-birilərinə dəstək olmalarını, motivasiya etdiklərini də öyrəndik. BDU-da yaşadıqlarının olduqca gözəl və özəl olduğunu deyən məzunumuz, bunları heç vaxt unutmayacağını dedi. O, yaxın gələcəkdə özünün və qrup yoldaşlarının ixtisaslarına uyğun iş tapıb, ailələrinə və Vətənə yararlı olacaqlarına ümidli olduğunu da bildirdi. Bakı Dövlət Universitetinin məzunu olmağın sevincini yaşayan Mətanət, “Dörd ilinizin unudulmaz, xoş xatirələrlə dolu bir şəkildə keçməyini istəyirsinizsə, sevdiyiniz ixtisası öyrənin" deyərək abituriyentlərə səsləndi. Həmçinin onları daima öyrənməyə, çalışmağa, yeniliklərdən xəbərdar olmağa çağırdı.



Hüquq fakültəsinin məzunu olmaqla xəyalları gerçək olan Nərmin Xəlilzadə təhsil aldığı müddət ərzində müəllimlərinin ona verdikləri biliklərlə yanaşı, oxuduğu fakültəni, çalışacağı peşə sahəsini də sevdirdiklərini deyir. O, dövlət orqanlarında fəaliyyət göstərən professor-müəllimlərlə tanış olmağın, onların təcrübələrini və məsləhətlərini dinləməyin hədsiz qürurverici olduğunu bildirdi.  Nərmin deyir ki, Bakı Dövlət Universiteti ona bilik əldə etməklə yanaşı, möhkəm dostluqlar və unudulmaz xatirələr də qazandırıb. Xatirələrindən birinin BMT-nin Narkotiklər və Cinayətkarlığa qarşı Mübarizə Baş İdarəsinin Korrupsiya və iqtisadi cinayətlər idarəsinin, BDU-nun Hüquq fakültəsinin və Rusiya Federasiyasının Xarici İşlər Nazirliyinin Moskva Dövlət Beynəlxalq Əlaqələr Universitetinin birgə təşkilatçılığı ilə Hüquq fakültəsində təşkil olunmuş “Korrupsiyaya qarşı mübarizə” sahəsində tədris seminarında iştirakı olub. Məzunumuz BDU-da təhsil aldığı müddətdə yüzlərlə namizəd arasından seçilərək Çinin Tsinxua Universitetinin yay məktəbində iştirak etmək şansı da qazanıb. Universitet daxilində ELSA və Tələbə Həmkarlar Təşkilatının üzvü olub. Yorulmadan öz üzərində işləyən Nərmin, Universitetdə təhsil alması ilə bərabər, Azərbaycan Respublikasının Ali Məhkəməsinin Mülki və Cinayət kollegiyalarında üç ay müddətinə könüllü xidmət göstərib, fəaliyyətini fərqlənmə ilə başa vurub. Söhbətimiz zamanı öyrəndik ki, Nərmin son aylarda istehsalat təcrübəsində olduğu Azərbaycan Respublikasının Ədliyyə Nazirliyinin Akademiyasında, Nərimanov rayon Məhkəməsi və Nizami rayon Prokurorluğunda fəaliyyət göstərərək bilik və təcrübəsini daha da zənginləşdirib. Onunla bir az da gələcək planlarından danışdıq. Bildirdi ki, hazırki planı Azərbaycan Diplomatik Akademiyasının magistratura pilləsinin “Dövlət idarəetməsi” ixtisasında təhsilini davam etdirməkdir. Başlıca hədəfinin isə respublikamızda fəaliyyət göstərən dövlət orqanlarında ədalətlilik prinsipi əsasında, əlindən gələnin ən yaxşısını edərək çalışmaqdır. Nərmin abituriyentlərə  ixtisas seçimində ailələrin, böyüklərin məsləhətlərini dinləyib yekun qərarı özlərinin verməsinin vacibliyini vurğuladı. Bildirdi ki, sevdiyi işi görən insanların iş həyatında qazandığı uğurların daha çox olması dəfələrlə müxtəlif təcrübələrlə sınanıb və sübut olunub.  O, abituriyentlərə  həm də özlərini xəyallarındakı işin sahibi kimi təsəvvür etməyi tövsiyə etdi. Bildirdi ki, bu onlara motivasiya verəcək və uğura aparacaq.



Jurnalistika fakültəsinin məzunu olan Elbrus İbrahimov BDU-nun ona ilk növbədə dəyərli insanlarla tanışlıq qazandırdığını, universitetə qəbul olunduğu gündən məzun olanadək yeni biliklər öyrəndiyini dedi. Həmsöhbətimiz II kursda oxuyandan həm də çalışmağa başlayıb, BDU TV onun üçün ilk təcrübə yeri olub. Səs redaktorluğu ilə başlayan təcrübə xəbər aparıcılığına qədər yüksəlib. Daha sonra nitq təlimçisi kimi fəaliyyət göstərib, hazırda isə ARB TV-də çalışır. Universitetə qəbul olanadək insanlarla ünsiyyət qurmaqda çətinlik çəkdiyini deyən Elbrus, universitetə daxil olduqdan sonra qrup yoldaşları və digər insanlarla ünsiyyət qurma bacarığının formalaşdığını bildirdi. Məzunumuz gələcək planlarından danışarkən, əsas məqsədinin ölkə xaricində magistratura təhsili almaq, özünü inkişaf etdirib, şəxsi şirkətini yaratmaq olduğunu söylədi. Abituriyentlərə tövsiyə olaraq, istəmədikləri ixtisasda oxuyub, həyatlarının dörd ilini boş yerə hədər vermək əvəzinə, özlərini hansı sahədə görmək istəyirlərsə, o sahə üzrə təhsil almağı qarşılarına məqsəd qoysunlar dedi. BDU məzunu olmasının qürurunu yaşayan Elbrus, BDU-nun həyatındakı yerinin əvəzsiz olduğunu vurğuladı.



Kitabxanaçılıq-informasiya fakültəsindən məzun olan İzzət Mikayılzadə gənc yazıçıdır. Universitetdə oxuduğu müddətdə ədəbiyyat adına işlər görməyə çalışıb. İşlərdən biri kimi 2019-cu ildə onun rəhbərliyi ilə reallaşan "Müharibədən sözə, sözdən sülhə" adlı lahiyədir. İzzət deyir ki, bu layihəni  Tələbə Həmkarlar İttifaqının, dostlarının və müəllimlərinin dəstəyi ilə həyata keçirib. Universitet qəzetində hekayələri, yazıları dərc olunub. İzzət tələbəlik illərində əldə etdiyi uğurlardan danışarkən, Bakı Dövlət Universitetinin 100 illik yubileyinə həsr olunmuş "Ulu Öndər Heydər Əliyev - Bakı Dövlət Universitetinin dünya şöhrətli məzunu" adlı publisistik məqalə müsabiqəsində II yerə layiq görüldüyünü də bildirdi. Gələcəklə bağlı xəyallarının çox olduğunu deyən məzunumuz ilk növbədə redaktor kimi işləyib təkmilləşmək istədiyini, hekayələrindən ibarət ilk kitabını nəşr etdirməyi, müxtəlif xarici dillər öyrənməyi arzu edir. Məzunumuz təcrübələrindən yola çıxaraq, abituriyentlərə dil bacarıqlarını inkişaf etdirməyi, oxuduqları peşəni sevməyi tövsiyə etdi. BDU-nun ona ailə kimi dostlar, dost kimi müəllimlər qazandırdığını vurğulayan İzzət Bakı Dövlət Universitetindən məzun olmağın sevincinin böyük olduğunu deyib, universitetin istənilən yerdə adı çəkiləndə bir addım öndə olmağın üstünlüyünə diqqət çəkib.



Ekologiya və torpaqşünaslıq fakültəsinin məzunu Ramid Afizov Bakı Dövlət Universitetinə qəbul olunmasını həyatının yeni başlanğıcı, dönüş nöqtəsi hesab edir. Deyir ki, BDU sayəsində professor və akademiklərin mühazirələrini dinləmək şansı qazanıb, təzə dostlar, yeni tanışlıqlar əldə edib. Ramidin sosial fəaliyyəti  I kursdan öz təsirini göstərib. 2017-ci ildə IV İslam Həmrəyliyi oyunlarında komanda rəhbəri olub, təcrübə qazanıb. II kursda Tələbə Gənclər Təşkilatının Ekologiya və torpaqşünaslıq fakültəsi üzrə sədr müavini, III kursda isə təşkilatın fakültə sədri olaraq fəaliyyət göstərib, sosiallaşma bacarıqlarını inkişaf etdirib. BDU-nun 100 illiyinə həsr olunmuş Enactus2019 komandasında yeganə fakültə təmsilçisi olub, proqram çərçivəsində "Siqaret çəkmə, ağac ək" devizi altında keçirilən fləşmobun ideya rəhbəri, təşkilatçısı olub. Məzunumuz deyir ki, Enactus Azərbaycan tərəfindən sertifikatla təltif olunmağım, universitet miqyasında özümü doğrultmağıma şərait yaradıb. Doğma Universitetindən ayrılarkən Ramid həm təəssüf hissi keçirir, həm də flaqman ali təhsil ocağından məzun olmağın sevincini yaşayır.



Tarix fakültəsinin məzunu olan Lalə Əsgərova hədəflərinə doğru irəlilədiyi yolda Bakı Dövlət Universitetinin misilsiz bir vasitəçi olduğunu deyir. Məzunumuz Bakı Dövlət Universitetinin mövcud olduğu 100 il  ərzində xalqımızın maariflənməsində, milli təfəkkürünün formalaşmasında oynadığı müstəsna roldan danışdı, tələbələrin inkişafı üçün ziyalıların, görkəmli pedaqoqların iştirakı ilə mütamadi olaraq tədbirlərin təşkil edildiyini bildirdi. Lalə 2017-ci ildə Bakı Dövlət Universitetində keçirilən "Azərbaycanda türk xalqları tarixinin tədqiq və tədrisi məsələləri" Respublika elmi-praktik konfransında iştirak edib. Bununla yanaşı “Türk dünyası gənc tədqiqatçılar dərnəyinin araşdırmaları" adlı jurnalda üç məqaləsi çap edilib. Lalə universitet seçimi edəcək abituriyentlərə məhz Bakı Dövlət Universitetini seçib, təhsillərini burada davam etdirməyi məsləhət gördü. Gələcəyə gedən yolda özünə bələdçi kimi Bakı Dövlət Universitetini seçdiyini deyən Lalə, magistratura təhsilini də BDU-da alacaq.

Sosial şəbəkələrdə paylaş:
Kateqoriya:
GƏNCLƏR və İDMAN
Gülağa Tənha "Dərdin nazını çəkmə" adlı kitabın təqdimatı. Çıxışçı: Rəqqasə Məryam (giriş hissə)17:32, 19 sentyabr 2020
Mərkəzi Gömrük Hospitalının yüksəkixtisaslı ümumi cərrahı Aynur Səfiyeva hazırda Hospitalda COVİD-19 xəstələrinin müalicəsi ilə məşğul olur 13:22, 19 sentyabr 2020
“Milli mədəniyyətimizin Üzeyir zirvəsi” adlı musiqili-bədii layihəyə start verilib - VİDEO 13:20, 19 sentyabr 2020
Elektron qolbaqlar necə işləyir? - Nazirlik rəsmisi açıqladı 13:18, 19 sentyabr 2020
Ermənistana Gəncə mesajı: -“Başınıza od yağdıracağıq!” 13:16, 19 sentyabr 2020
Azərbaycanda bu silahları əldə etmək olar -QAYDALAR (VİDEOREPORTAJ) 13:14, 19 sentyabr 2020
Şantaj edildiyinə görə intihar edildiyi deyilən müəllimlə bağlı yeni xəbər 13:11, 19 sentyabr 2020
Gülağa Tənha "Dərdin nazını çəkmə" kitab təqdimatı. İlk dəfə15:50, 18 sentyabr 2020
Bank VTB (Azərbaycan) Sahibkarlığın İnkişafı Fondu ilə güzəştli kreditlərin verilməsinə dair əməkdaşlığa başlayıb 13:46, 18 sentyabr 2020
Çinli virusoloqdan şok açıqlama: "Virusu biz hazırladıq" (VİDEO) 13:43, 18 sentyabr 2020
Paxlavanın altında xarici valyutanı gizlədərək keçirmək istədi 13:42, 18 sentyabr 2020
Müdafiə naziri: Əsgərdən generaladək hər bir hərbi qulluqçumuz torpaqlarımızın azad edilməsinə hazırdır 13:40, 18 sentyabr 2020
Dəmir çatışmazlığı olanların nəzərinə... 13:38, 18 sentyabr 2020
Bank BTB pul köçürmə imkanlarını genişləndirərək UPT sisteminə qoşuldu 13:36, 18 sentyabr 2020
Qanunsuz balıq ovlayan şəxs cəzalandırılıb 16:35, 17 sentyabr 2020
Xalqın rəğbətini qazanan lider 16:33, 17 sentyabr 2020
"Musiqi sənətini ucuzlaşdırmışıq" - Bayağı ifalara üsyan etdilər 16:32, 17 sentyabr 2020
Xaçatur Abovyan: “Bizim dil ən azı 50 faiz türk sözlərindən ibarətdir…” 16:31, 17 sentyabr 2020
Azərbaycan Milli Xalça Muzeyi növbəti dəfə “Tripadvisor Travellers’ Choise” sertifikatına layiq görülüb 16:29, 17 sentyabr 2020
İstanbulda Bakının qurtuluş günü təntənə ilə qeyd edilib 16:28, 17 sentyabr 2020
 

Bütün hüquqlar qorunur © 2020

Haqqıımızda | Saytda reklam | Bizimlə əlaqə