Canveten.az xəbər verir ki, mayın 8-də Bakı Slavyan Universitetinin ikinci tədris binasında Azərbaycan filologiyası və jurnalistika fakültəsinin təşkilatçılığı ilə Şuşanın ermənilər tərəfindən işğalının 27-ci ildönümünə həsr edilmiş tədbir keçirilib. Tədbirin əvvəlində vətən uğrunda canından keçmiş şəhidlərimizin xatirəsi bir dəqiqəlik sükutla yad edilib.

Azərbaycan filologiyası və jurnalistika fakültəsinin dekanı,  professor Eldar Piriyev Şuşanın tarixi, dünəni və bu günü haqqında iştirakçıları məlumatlandırıb. Tədbirdə çıxış edən Azərbaycan dilinin tədrisi metodikası kafedrasının müdiri, dosent Səməngül Qafarova Şuşanı Azərbaycanın tacı, qürur mənbəyi, mədəniyyət beşiyi kimi dəyərləndirib.

 Sonra III kurs tələbələri Elxan Həsənov və Şəmil Qurbanov Şuşa ilə bağlı şeirlər səsləndiriblər. Azərbaycan filologiyası və jurnalistika fakültəsi üzrə Tələbə Elmi Cəmiyyətinin (TEC) sədri Laləzar Hüseynova Şuşanın ermənilər tərəfindən işğalının 27-ci ildönümü ərəfəsində tələbələr arasında keçirilmiş  “Havalansın xanın səsi” adlı esse müsabiqəsi barədə iştirakçılara məlumat verib.

Tədbirdə çıxış edən Azərbaycan filologiyası və jurnalistika fakültəsinin 1-ci kurs tələbəsi, Aprel döyüşlərinin iştirakçısı Elvin Həşimov öz cəbhə xatirələrini bölüşüb.

Sonra esse müsabiqəsinin I yer üzrə qalibi Səma Bayramlı, II yerin qalibi Nuray Babayeva, III yerin qalibi Sevda Əhmədova fakültə dekanı Eldar Piriyev tərəfindən diplomlarla təltif ediliblər.

Tədbir “Şuşa dünən və bu gün” adlı video-çarxın nümayişi ilə başa çatıb.

! © Müəllif hüquqları qorunur ! Məlumatdan istifadə etdikdə istinad mütləqdir ! Məlumat internet səhifələrində istifadə edildikdə müvafiq keçidin qoyulması mütləqdir !!!  

ŞƏRHLƏR :

( Sos.şəbəkədə gedən yazışmanin FOTO-ƏKSİ. Məzmun və qramatik səhvlərə görə redaksiya məsuliyyət daşımır )