Masallı Rayon İcra Hakimiyyətinin başçısı Araz Əhmədov ümumtəhsil məktəblərinin rəhbərləri ilə görüş keçirib.

Əvvəlcə Ümummilli Lider Heydər Əliyevin və şəhidlərimizin xatirəsi bir dəqiqəlik sükutla yad edilib.

Masallı Rayon İcra Hakimiyyətinin başçısı Araz Əhmədov bildirib ki, müasir Azərbaycan dövlətinin qurucusu, Ümummilli Lider Heydər Əliyevin müəyyənləşdirdiyi strategiyanın möhtərəm Prezident İlham Əliyev tərəfindən uğurla həyata keçirilməsi ölkəmizin qarşısında böyük imkanlar açır: “Bu gün müstəqil Azərbaycanımızın beynəlxalq aləmdə iqtisadi və siyasi mövqeyini daha da möhkəmləndirməsi, beynəlxalq qurumların hesabatlarında islahatçı ölkə kimi yer tutması, dünyanın nüfuzlu təşkilatlarının Azərbaycanın mövqeyini dəstəkləyən qərar və qətnamələr qəbul etməsi bir həqiqəti ortaya qoyur ki, ölkəmizin seçdiyi yol düzgündür və bu yol bizi daha uğurlu gələcəyə aparır...”

Təhsil sahəsində əldə edilən nailiyyətlərdən danışan rayon rəhbəri dövlət başçısının təhsilə, millətin gələcəyi olan gənc nəslə göstərdiyi diqqət və qayğıdan danışaraq qeyd edib: “2021-2022-ci tədris ili başa çatıb. Yeni dərs ilində sizlərə və rəhbəri olduğunuz kollektivə düzgün mövqe tutmağı, vəzifəsindən, peşəsindən asılı olmayaraq hər kəsə işinə məsuliyyətlə yanaşmağı arzu edirəm. Bu görüş bizim ilk tanışlıq görüşümüz olmaqla yanaşı həm də məktəblərdə şagirdlərin buraxılış və ali məktəblərə qəbul imtahanlarının nəticələrinin təhlililə əlaqədardır. Yeni dərs ilindən zəif nəticəsi olan məktəblərin rəhbərləri təhsilin keyfiyyətinin yüksəldilməsi istiqamətində bütün qüvvələri səfərbər edilməlidir. Bir sözlə, nöqsanlar aradan qaldırılmalıdır...”

Lənkəran-Astara Regioanal Təhsil İdarəsinin Masallı rayonu üzrə təhsil sektorunun müdiri Qoşqar Hətəmov məlumat verib ki, hazırda rayon üzrə təhsil sektorunun strukturuna 95 ümumi təhsil məktəb, o cümlədən 66 tam orta, 26 ümumi orta, 3 ibtidai məktəb, 2 məktəbdənkənar və 17 məktəbəqədər təhsil müəssisəsi daxildir.

Hişkədərə kənd E.Ağayev adına tam orta məktəbin direktoru İlham Ağayev, Qızılavar kənd Ə.Mirzəyev adına tam orta məktəbin direktoru Lətifə Qənbərzadə və başqaları qazanılan uğurlardan və qarşıda duran vəzifələrdən danışıblar.

Akif AĞAYEV.