Lənkəran-Astara Regional Təhsil İdarəsinin tabeliyində olan ümumtəhsil müəssisələrini gümüş və qızıl nişanla bitirən, ali təhsil müəssisələrinə qəbul imtahanında 600 baldan yüksək nəticə göstərən və Respublika Fənn Olimpiadasının qalibi olan (2021-2022-ci tədris ilində) məzunların mükafatlandırma mərasimi keçirilib.

Avqustun 30-da, Lənkəran şəhər Mədəniyyət Mərkəzində təşkil olunan tədbirdə müxtəlif nominasiyalar üzrə, ümumilikdə, 99 məzun (600 baldan yüksək nəticə göstərən 68 məzun, Respublika Fənn Olimpiadalarında qalib olmuş 24, orta məktəbi qızıl medalla bitirən 2, gümüş medalla bitirən 5 şagird, ABŞ-ın nüfuzlu universitetlərinə təqaüdlə qəbul olan 2 şagird) iştirak edib.

Tədbirdə Astara, Cəlilabad, Lənkəran, Lerik, Masallı və Yardımlı rayonları üzrə yerli icra hakimiyyətlərinin nümayəndələri, müvafiq rayonlar üzrə sektor müdirləri, regionda fəaliyyət göstərən ali təhsil ocaqlarının, kollec və peşə liseylərin rəhbərləri, media təmsilçiləri iştirak edib.

Lənkəran-Astara Regional Təhsil İdarəsinin müdiri Elxan Nəcəfov tədbiri açıq elan edib.

Çıxış edənlər məzunlara yeni müvəffəqiyyətlər arzulayıblar.

Ümumtəhsil müəssisələrini uğurla bitirmiş məzunlara, Respublika Fənn Olimpiadasının qaliblərinə müxtəlif hədiyyə və təltifnamələr təqdim olunub.

Tədbir bədii hissə ilə davam edib.

Akif AĞAYEV.