Azərbaycan Respublikası Milli Paralimpiya Komitəsinin boccia idman növü üzrə milli komandasının üzvləri baş məşqçi İlham Məhərrəmovun rəhbərliyi altında Polşanın Poznan şəhərində keçirilən qitələrarası çempionatında uğurlu nəticələr göstərirlər. Millimiz turnirə 6 idmançı ilə qatılıb.

Paralimpiyaçımız Bəhruz Mirzəyev "World Challenge" kubokunda bütün rəqiblərinə qalib gələrək yarışın qızıl medalına sahiblənib.

Bu yarışdan öncə isə B.Mirzəyev (BC4) Niderlandın Veldhoven şəhərində keçirilən “Intercontinental Challenger” turnirində 3-cü yerə layiq görülmüşdü.

Qeyd edək ki, hər iki yarış Paris 2024 XVII Yay Paralimpiya Oyunlarına lisenziya xalı qazandırır.

Məlumat üçün bildirək ki, Bəhruz Şakir oğlu Mirzəyev 8 aprel 1988-ci ildə Viləş kəndində (keçmiş Kalinovka) anadan olub. Şəhid Seyran Hacıyev adına Viləş kənd tam orta məktəbini bitirib. Boccia İdman Federasiyasına 2018-ci ilin martından – Heydər Əliyev Fondunun vitse-prezidenti Leyla Əliyevanın şəxsi dəstəyilə yaradılan vaxtdan qoşulub. Üç dəfə ölkə birinciliyində iştirak edən bocciaçı ikiqat Azərbaycan çempionu tituluna yiyələnib. Belarusun paytaxtı Minskdə təlim-məşqlərdə iştirak edib. İspaniyanın Madrid şəhərində keçirilən açıq regional çempionatda 12 ölkə arasında Macarıstan, İspaniya və Fransa təmsilçilərini – 20 illik təcrübəyə malik oyunçuları məğlub edib. Azərbaycanda keçirilən Türkiyənin milli komandası ilə yoldaşlıq görüşündə (28 dekabr 2017-ci il ) 3-cü yerin sahibi olub. İtaliyanın Olbiya şəhərində 15 Avropa komandası arasında təşkil olunan yarışlarda, açıq regional turnirdə Bəhruz qızıl, millimiz isə komanda yarışında bürünc medala layiq görülüb.
Boccia üzrə İtaliyada keçirilən beynəlxalq səviyyəli açıq regional turnirdə (21-28 oktyabr 2018-ci il) BC 4 kateqoriyasında ölkəmizə qızıl medal qazanıb. Beləliklə, boccia üzrə Paralimpiya millimizin beynəlxalq yarışda qazandığı bu möhtəşəm zəfərlə B.Mirzəyev İtaliyada tarix yazıb.
2018-ci ildə Bəhruz Mirzəyev boccia idman növü üzrə ilin ən yaxşı paralimpiyaçısı adına layiq görülüb.

Tel-Əviv şəhərində keçirilən İsrail açıq çempionatında (18-23 dekabr 2018-ci il), Xorvatiyanın Zaqreb şəhərində keçirilən “Intercontinental Challenger” (qitələrarası) çempionatında (02-08 aprel 2022-ci il) qızıl medal qazanıb.

Akif AĞAYEV,                       

Azərbaycan İdman Jurnalistləri Assosiasiyasının üzvü