Ulu Öndər Heydər Əliyevin 1993-cü ildə yenidən müstəqil Azərbaycan dövlətinin rəhbərliyinə gəlməsi, müstəqil dövlətin formalaşdırılması və inkişaf etdirilməsi baxımından addımlar atması, dövlət təhlükəsizliyinin möhkəmlənməsinə səbəb olmuşdur. Bu, Qarabağ münaqişəsinin həlli baxımından da həlledici faktorun həyata keçirilməsi deməkdir. Görkəmli dövlət xadiminin ayrı-ayrı qruplara məxsus olan həvəskar batalyonları ləğv edərək vahid komandanlığa tabe olan mütəşəkkil, nizamlı ordu yaratması müstəqil dövlətin hərb siyasətinin qətiyyətlə həyata keçirilməsini təmin etmişdir.
Heydər Əliyevin start verdiyi və strategiyasını müəyyən etdiyi İpək yolu layihəsi beynəlxalq nəqliyyat dəhlizlərinin yaradılması ilə nəticələnmişdir. Bir qədər sonra ölkəmizin ərazisində yaradılmış müxtəlif nəqliyyat dəhlizləri Heydər Əliyevin İpək yolu strategiyasının töhfələridir. Məhz Heydər Əliyevin İpək yolu strategiyası Azərbaycanın qədim İpək yolunu bərpa edərək beynəlxalq nəqliyyat dəhlizlərinə qoşulmasına şərait yaratmışdır.
Ümummilli Lideriin xalqın təkidli tələbi ilə ölkə rəhbərliyinə qayıdışı iqtisadi, siyasi və mənəvi sahələrdə uğurlu nəticələr əldə etməyə imkan verməsi Vətənimizin inkişafına müsbət təsirini göstərdi. Heydər Əliyevin mənalı və məzmunlu ömür yoluna nəzər saldıqda görürük ki, Ulu Öndər öz xalqının və dövlətinin ən çətin anlarında yanında olmaqla göstərdiyi misilsiz xidmətləri ilə seçilən dahi insanlara xas olan xüsusiyyətlərə malik bir şəxsiyyət olmuşdur. Dahilərin böyüklüyü isə ondadır ki, onlar hər şeyin əvvəlini bildikləri kimi sonunu da görür və dərk edirlər. Heydər Əliyev də məhz belə dahilərdən idi. Heydər Əliyevin son qərarı əslində Azərbaycana son borcu, son xidməti idi. Bu qərardan Azərbaycan dövlətinin taleyi asılı idi. Heydər Əliyev bu son borcunu da şərəflə yerinə yetirdi. Onun 2003-cü il oktyabrın 1-də doğma xalqına ünvanladığı son müraciəti vətənə ləyaqətlə xidmətin son nümunəsi idi: "Üzümü sizə - həmvətənlərimə tutaraq qarşıdan gələn prezident seçkilərində prezidentliyə namizəd, mənim siyasi varisim, Yeni Azərbaycan Partiyası sədrinin I müavini İlham Əliyevi dəstəkləməyə çağırıram. O, yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir.
Şübhə etmirik ki, Prezident İlham Əliyevin rəhbərliyi altında xalqımız bu şərəfli vəzifənin də öhdəsindən gələcək və Azərbaycan Respublikası bünövrəsi Ümummilli Lider Heydər Əliyev tərəfindən qoyulan inkişaf yoluna bundan sonra da uğurla davam edəcək.
Milli-mənəvi dəyərlərin qorunması və təbliği istiqamətində həyata keçirilən tədbirlərdə Ulu Öndərin adını daşıyan Heydər Əliyev Fondunun da müstəsna payı var. Yarandığı ilk gündən fonda uğurla rəhbərlik edən Azərbaycan Respublikasının Birinci vitse-prezidenti Mehriban xanım Əliyevanın təşəbbüsü ilə həyata keçirilən çoxşaxəli layihələr də ilk növbədə məhz milli genefondun, milli-mənəvi irsin qorunmasını hədəfləyir. Ölkənin birinci xanımı Azərbaycan mədəniyyətinin dünyada təbliğ olunması işinə misilsiz töhfələr verməklə milli dəyərlərimizin himayədarı kimi şöhrət qazanmışdır. Mehriban xanım xeyirxahlığı, nəcibliyi çoxşaxəli ictimai-siyasi fəaliyyəti, ölkəmizi beynəlxalq miqyasda ləyaqətlə təmsilçiliyi ilə Azərbaycan xalqının sevimlisinə və qadınların örnəyinə çevrilmişdir.
Əminliklə deyə bilərəm ki, indi Heydər Əliyevin ruhu şaddır. Azərbaycan Respublikasının Prezidenti, Ali Baş Komandan İlham Əliyev onun arzularını həqiqətə qovuşdurub, ata vəsiyyətinə əməl edib, azğın düşmənin cavabını verərək şəhidlərimizin qanını yerdə qoymayıb. Bütün bu inkişaf, uğurlar isə Heydər Əliyev ideyalarının təntənəsi kimi dəyərləndirmək olar.