Ermənistanda İkinci Qarabağ müharibəsi zamanı ölən hərbçilərin ailələri hərbi xidmətdən azad oluna bilər. Bu barədə yerli media məlumat yayıb. Bildirilir ki, hökumət 2020-ci ildəki müharibədə öldürülmüş hərbçilərin qardaşlarının məcburi hərbi xidmətdən azad edilməsini təklif edib. Qanuna edilən müvafiq düzəliş bu gün Ermənistan hökuməti tərəfindən təsdiqlənib.
Məsələ burasındadır ki, qüvvədə olan “Hərbi vəzifə və hərbi qulluqçunun statusu haqqında” qanunda hərbi xidmətdən azad edilmənin ilkin şərti kimi potensial hərbçinin ailədə yeganə oğul olması nəzərdə tutulur.
Bu arada hökumət qeyd edir ki, 44 günlük Qarabağ müharibəsində ölən hərbçilərin məcburi hərbi xidmətə cəlb olunan kiçik qardaşları da var.
- Onların bir çoxunun valideynləri ağır psixoloji və sosial vəziyyətdədirlər, kiçik oğullarını xidmətə göndərmək istəmirlər. Bu ailələrin digər üzvlərinə məcburi hərbi xidmətdən azad olmaq imkanı verməklə, nəticədə həmin ailələr üzləşdikləri psixoloji və sosial problemlərin öhdəsindən daha rahat gələ biləcəklər, - qanuna dəyişikliklə bağlı əsaslandırmada qeyd olunur.
Qanunvericilik təşəbbüsü hökumət tərəfindən müzakirə olunmadan təsdiqlənib və yaxın vaxtlarda baxılması üçün parlamentə təqdim olunacaq.
Qeyd edək ki, İkinci Qarabağ müharibəsi zamanı ağır məğlubiyyətlə üzləşən Ermənistanda ölü, itkin və yaralı sayı o qədər çoxdur ki, hökumət hələ də dəqiq statistikanı cəmiyyətə təqdim etməyib.
Bütün hüquqlar qorunur © 2024