Canveten.az xəbər verir ki, 2019-cu il, 16-18 aprel tarixlərində, Bakı şəhərində keçiriləcək Narkotiklərlə Mübarizə üzrə 36-cı Beynəlxalq Konfransla əlaqədar 16 aprel 2019-cu ildə saat 1200-da Azərbaycan İstiqlal Muzeyində “Narkomaniya bəşəriyyətin bəlası” adlı tədbir-sərgi keçirildi. Azərbaycan Respublikası müstəqillik əldə etdikdən sonra narkotizm probleminə münasibətdə yeni mərhələ başlanmışdı. Azərbaycan Respublikasında narkotizmlə və narkobizneslə mübarizənin əsasını tarixdə ilk dəfə olaraq ümummilli lider Heydər Əliyev qoymuşdur və hal-hazırda bu iş davam etdirilir. Azərbaycan Respublikası Prezidenti cənab İlham Əliyev tərəfindən imzalanan Dövlət proqramları çərçivəsində müxtəlif tədbirlər həyata keçirilir. Həmin dövlət proqramına əsasən Azərbaycan İstiqlal Muzeyi tərəfindən Bakı şəhərində 2016-2018-ci illərdə Hikmət Nəzərli adına 27 nömrəli, Yasamal rayonu Şəfiqə Əfəndizadə adına 13 nömrəli məktəblərdə və Fizika- Riyaziyyat və İnformatika təmayüllü liseydə şagirdlər üçün maarifləndirici tədbir-sərgilər təşkil edilmiş, mövzu ilə əlaqədar filmlər nümayiş etdirilmişdir. Tədbirdə Azərbaycan İstiqlal Muzeyinin direktoru Fəridə Şəmsi, Azərbaycan Respublikası Mədəniyyət nazirinin müavini Rafiq Bayramov, Azərbaycan Rəssamlar İttifaqının katibi, xalq rəssamı Ağaəli İbrahimov, Sənətşünaslıq üzrə fəlsəfə doktoru, əməkdar incəsənət xadimi, Ziyadxan Əliyev, Bakı şəhər Baş Səhiyyə İdarəsi Şəhər Narkoloji Dispanserinin həkimi Məmmədova Pərvanə çıxış etdilər. Sərgidə Azərbaycan Dövlət Rəssamlıq Akademiyasının, Qərbi Kaspi Universitetinin tələbələri və digər gənc rəssamların narkomaniya problemini əks etdirən 30-a qədər əl işi nümayiş etdirilir. Tədbirdə Azərbaycan Dövlət Gənc Tamaşaçılar Teatrının hazırladığı “Ağ Ölüm” tamaşasından monoloq nümayiş etdirildi. Tədbirdə Azərbaycan Dövlət Rəssamlıq Akademiyasının, Azərbaycan Dövlət Dəniz Akademiyasının, Azərbaycan Dövlət Pedaqoji Universitetinin, Azərbaycan Turizm və Menecment Universitetinin tələbələri, Milli Qvardiyanın əsgərləri və digər qonaqlar iştirak etdilər. Sərgi konfrans çərçivəsində 16-18 aprel tarixlərində nümayiş olunacaq. ! © Müəllif hüquqları qorunur ! Məlumatdan istifadə etdikdə istinad mütləqdir ! Məlumat internet səhifələrində istifadə edildikdə müvafiq keçidin qoyulması mütləqdir !!! ŞƏRHLƏR : ( Sos.şəbəkədə gedən yazışmanin FOTO-ƏKSİ. Məzmun və qramatik səhvlərə görə redaksiya məsuliyyət daşımır )
Bütün hüquqlar qorunur © 2024