Erməni iş adamları Ukrayna biznesində "Rusiyaya qarşı mübarizə" adı altında qumar və mərc sektorundakı digər şirkətləri bazardan kənarda saxlamağa çalışırlar.

Bu barədə Ukraynanın “Apostrof” qəzeti yazır.

Oktyabrın 30-da Ukrayna prezidentinin saytında “Təcavüzkar dövlətlə əlaqəli və Ukraynada Rusiya biznesinə dəstək verən şirkətlərə qarşı sanksiyaların tətbiqinə dair” petisiya başladı. Beləliklə, Ukraynada bütün onlayn kazino və bukmeker kontorlarına lisenziya verən KRAIL-in (Qumar və Lotereya Oyunlarının Tənzimlənməsi üzrə Komissiya) siyahısında olan şirkətlərin əksəriyyəti bağlanma riski qarşısında qaldı. Amma bu gün həmin şirkətlər qanuni fəaliyyət göstərir, bütün lazımi lisenziyalara malikdir.

Petisiyanın müəllifi, fotoqraf Viktoriya Melyuşkova müştərisi "VBet" bukmeker kontoru olan “Business Tuning Center” reklam agentliyinin keçmiş əməkdaşıdır.

"VBet"in sahibi Ermənistan vətəndaşı Vigen Badalyandır. Badalyan şirkətləri vasitəsilə Rusiyanın “Fonbet” bukmeker kontoru ilə əməkdaşlıq edir. Bundan əlavə, o, “Fastex” şirkəti vasitəsilə Rusiya Poker Turuna sponsorluq və oyunları təşkil edir.

"VBet" 2021-ci ilin yayında “Favbet” şirkətini Ukrayna Premyer Liqasının sponsorluğundan çıxarıb. Bu, “Favbet”in ofislərində aparılan axtarışlarla üst-üstə düşüb. Sonradan "VBet" milli komandanın sponsoru olub. Ötən mövsüm "VBet" Ukrayna klublarına 1 milyon dollar ödəməli idi, amma onlar cəmi 720 min dollar alıblar.

“Ukraynanın vətənpərvər formalarını mənimsəyən erməni şirkəti Ukraynada qumar və mərc biznesini ələ keçirir. Bu, həssas məsələdir. Çünki Ermənistanın kimin siyasi təsiri altında olduğunu hamı bilir”, - nəşr yazır.