Teymur bəy Bayraməlibəyovun anadan olmasının 160 illiyi münasibətilə Masallı rayonunun Yeddioymaq ərazisində görkəmli mütəfəkkirin büstünün açılışı olub.

Tədbir iştirakçıları əvvəlcə Masallı şəhərində Ulu öndər Heydər Əliyevin abidəsini, "Qəhrəmanlar Parkında" şəhidlər abidə-kompleksini ziyarət edib, önünə gül dəstələri düzüblər.

İkinci Yeddioymaq kəndində - bir vaxtlar yaradıcısı olduğu, hazırda maarifpərvər ziyalının adını daşıyan 2 saylı tam orta məktəbin önündə ucaldılan büstün açılış mərasimində Masallı Rayon İcra Hakimiyyətinin başçısı Araz Əhmədov, millət vəkilləri Məşhur Məmmədov, Anar İsgəndərov, Fazil Mustafa, Musa Qasımlı, Etibar Əliyev, Razi Nurullayev və rayon ictimaiyyətinin nümayəndələri iştirak ediblər.

Milli Məclisin deputatı Məşhur Məmmədovun təşəbbüsü və maliyyə dəstəyi ilə hazırlanan büstün açılışından sonra Masallı Rayon Mədəniyyət Mərkəzində insanların, xüsusilə qızların maariflənməsində böyük rol oynamış, Qori müəllimlər seminariyasının məzunu Teymur bəy Bayraməlibəyovun həyat və fəaliyyətini əks etdirən sənədli filmin təqdimatı olub.

Akif AĞAYEV.