Masallıda Nadir Ağayevin xatirəsi anılıb

Masallıda, məşhur güləşçi, Yunan-Roma güləşi üzrə SSRİ idman ustası, Azərbaycanın əməkdar məşqçisi, respublika dərəcəli hakim, mərhum Nadir Yaqub oğlu Ağayevin (23.09.1935-25.01.1985) anadan olmasının 87 illiyi münasibətilə xatirəsi anılıb.

Masallı Rayon Gənclər və İdman İdarəsinin rəisi Sabiq Cahangirov bildirib ki, Dövlət başçısının diqqət və qayğısı nəticəsində ölkəmizdə idman sürətlə inkişaf edir, daha yüksək zirvələrə doğru irəliləyir. Respublikada idman və Olimpiya hərəkatının yüksək sürətlə inkişafından danışan idarə rəisi Masallıda da uşaq və gənclərimizin idmanla məşğul olması üçün hər cür şərait yaradılığını qeyd edib, rayonda yunan-Roma güləşinin inkişafında yarıməsrlik ömrünün yarıdan çoxunu bu sahəyə sərf etmiş Nadir Ağayevin xidmətlərindən danışıb.

Görüş zamanı Nadir Ağayevin mənalı həyat və fəaliyyətindən bəhs edilib, yetirmələrinin bu şəxs haqqında xatirələri dinlənilib.

Çıxışlarda adı Azərbaycan güləşinin təşəkkülü və inkişafı ilə qırılmaz sürətdə bağlı olan, idman tariximizdə şərəfli iz buraxmış məşqçi-müəllim, ustad pedaqoq, gözəl ziyalı, unudulmaz və xeyirxah insan N.Ağayev cənub bölgəsində milli güləş yaradıcılarının öncüllərindən biri kimi səciyyələndirilib, Nadir Ağayev güləş məktəbi ənənələrinin bu gün uğurla davam etdirildiyi vurğulanıb.

Akif AĞAYEV,

foto: Elsevər Əliyev, Faiq Mirzə