“Vətənə əsgər olaq” – Masallıda tədbir
 

Masallı Tarix-Diyarşünaslıq Muzeyi, rayon Heydər Əliyev Mərkəzi və “Azərbaycan Respublikası Müharibə, Əmək və Silahlı Qüvvələri” İctimai Birliyi rayon təşkilatının birgə təşkilatçılığı ilə “Heydər Əliyev İli” çərçivəsində 26 iyun - Azərbaycan Silahlı Qüvvələr Gününə həsr edilmiş “Vətənə əsgər olaq” adlı tədbir keçirilib.
Muzeydə təşkil olunan dəyirmi-masada hərbçilər, şəhid ailələri, müharibə veteranları, qazilər, mədəniyyət və mətbuat işçiləri iştirak ediblər.
Əvvəlcə Azərbaycanın ordu quruculuğunda əməyi olanların, Ulu öndər Heydər Əliyevin və şəhidlərimizin əziz xatirəsi bir dəqiqəlik sükutla yad olunub.
Muzeyin direktoru, Əməkdar mədəniyyət işçisi Əntiqə Tağıyeva Azərbaycan Silahlı Qüvvələrinin yaradılmasının 105 illiyi münasibətilə tədbir iştirakçılarını təbrik edib.
“Azərbaycan Respublikası Müharibə, Əmək və Silahlı Qüvvələr” İctimai Birliyinin rayon təşkilatının sədri Məmmədağa Şiriyev, “Azərbaycan Respublikası Qarabağ Müharibəsi Əlilləri, Veteranlar və Şəhid Ailələri” İctimai Birliyi Masallı filialının sədri Nahid Rəhimov, Masallı Heydər Əliyev Mərkəzinin baş fond mühafizi Gülcahan Vəkilzadə, ehtiyatda olan hərbçilərdən Ramiz Tağıyev, Ədalət Hüseynov, Vətən müharibəsi iştirakçısı Həmid Mənsimov və başqaları Azərbaycan Ordusunun yaranması, inkişafı və 44 günlük Vətən müharibəsində qazandığı möhtəşəm qələbədən danışıblar. 
Şəhid anası Mehriban Sultanzadə gənclərin vətənpərvər ruhda yetişməsində bu cür maarifləndirici tədbirlərin əhəmiyyətindən danışaraq, Vətənin keşiyində mərd dura bilən igid oğul böyütdüyünə görə qürur duyduğunu bildirib.
Masallı Regional Mədəniyyət İdarəsinin kommunikasiya meneceri Ceyhun Bəsirov ordunun mübarizliyinin onun xidmətində duran əsgərdən asılı olmasından bəhs edərək, torpaqlarımızın azadlığı uğrunda canından keçən Vətən oğullarının Azərbaycan tarixində, xalqımızın yaddaşında əbədi yaşayacaqlarını vurğulayıb.
Təşkilat komitəsi tərəfindən bir qrup ehtiyatda olan hərbçi, şəhid ailəsi və müharibə iştirakçısı, eləcə də Vətən müharibəsi zamanı arxa cəbhədə xidməti olanlar “Təşəkkürnamə” və Fəxr fərmanlarla təltif edilib. 
Tədbir iştirakçıları muzeyin Silahlı Qüvvələr Gününə həsr edilmiş “Mübariz ordumuz” adlı sərgisi ilə də tanış olublar.
 
Akif AĞAYEV