Canveten.az xəbər verir ki, 18 noyabr. 2019-cu il tarixində Azərbaycan Diasporuna Dəstək Fondunun maliyyə dəstəyi və Litvada yaşayan gənc azərbaycanlı Nərmin Əliyevanın təşkilatçılığı ilə Azərbaycan Respublikasının Dövlət Bayrağı Günü ilə əlaqədar Litvanın Kaunas şəhərindəkviz formatlı özündə Azərbaycan dili, mədəniyyəti, tarixini əks etdirən ingilis dilində intellektual yarışma keçirilib. Yarışma yerli və Ingiltərə, Hindistan, Vyetnam,  Slovakiya, Serbiya, Türkiyə, Qazaxıstan, Pakistan, Litva, Latviya, Ukrayna, Gürcüstan, İtaliya, Braziliyadan olan gənclərin iştirakı ilə baş tutub. Yarışda ümumilikdə hər biri 5 nəfərdən ibarət 15 komanda iştirak edib.

Yarış 3 mərhələdən ibarət təşkil olunub. Mərhələlər ümumi olaraq Azərbaycan bayrağınının tarixi, ölkəmizin mədəniyyəti və dünya şöhrətli insanları haqqında maraqlı və düşündürücü suallardan ibarət olub. İştirakçılar tərəfindən ən yaddaqalan suallar yazıçı Anarın və şair Fikrət Qocanın bənzətmələrindən olan suallar və dünya musiqilərinin Azərbaycan milli musiqi alətləri ilə ifa olunan video suallar seçilib. 

Tədbirin məqsədi Azərbaycanı fərqli perspektivdən tanıtmaq və bayrağımız, tariximiz, mədəniyyətimiz haqqında litvalı və digər xarici gəncləri məlumatlandırmaq idi. Yarışın qalibi İngiltərə, Ukrayna, Hindistan və Qazaxıstan gənclərindən ibarət komanda olub. İkinci yeri Serbiya və Türkiyədən olan gənclər əldə ediblər. Üçüncü yeri isə Slovakiya, Litva və Irlandiyadan olan gənclər qazanıblar.

Qaliblər sertifikatlar və Azərbaycanı əks etdirən xüsusi hədiyyələrlə təltif ediliblər. Yarış müddətində milli atribut və suvenirlərdən ibarət Azərbaycan guşəsi yaradılıb və milli şirniyyatlar iştirakçılara təqdim edilib.

Diqqətinizə çatdırmaq istərdik ki, Litvanın tələbə şəhərciyi sayılan Kaunasda artıq 2 ildir ki, xarici tələbələrin sevimli məşğuliyyətinə çevrilmiş intellektual (kviz formatlı) oyunlar baş tutur. Oyunların təşkilatçısı isə həmyerlimiz Nərmin Əliyevadır.

Xatırladaq ki, oyunlar “Quiz with Narmin” adı altında Kaunas şəhərindən başlasa da artıq məşhurluq qazanıb, qonşu Riqa və Vilnüs şəhərlərində də müntəzəm olaraq təşkil olunur. Sualları hazırlayan və təşkilatçı Nərmin Azərbaycanda keçirilən “LG Bilik Akademiyası”, “Virtual

Ring”, “Xəmsə”, “Breyn Rinq”  kimi bir çox intellektual verilişlərinin finalçısı olub. İlk universiteti Yakın Doğu Universitetində pulsuz təhsil və imtahansız attestatı da belə verilişlərdən birində - “Ağıl dəryası”nda qazanıb.

Bu yaxınlarda (Oktyabr ayında) Kaunas şəhərinin 2022-ci ildə Avropa Mədəniyyəti paytaxtı seçilməsilə əlaqədar olaraq, ilk dəfə Şəhər hekayələri festivalı keçirilmişdi. Festivala Kaunasda yaşayan xariciləri bir araya yığmaq məqsədilə beynəlxalq kviz yarışması keçirməsi üçün “Quiz with Narmin” Kaunas2022 komandası tərəfindən də xüsusi dəvət almışdır.

Oyunlarda indiyə qədər 130-dan çox komanda, 35-dən artıq fərqli ölkə nümayəndəsi iştirak

edib. Yarışlar həm yerli, həm də xarici gənclər arasında böyük maraq doğurur.